PlanetStudio Payment Gateway
Էլեկտրոնային ՀԴՄ (eHDM)
- ՀՆԷՀ-ում էլեկտրոնային ՀԴՄ-ի գրանցում
- Տեղադրում և արտոնագրի ակտիվացում
- Կարգավորումներ
- Փոխարժեքներ
- Արտարժույթով պատվերների կտրոնների տպում
- ՀԴՄ բաժիններ
- Ապրանքացանկի ստացում
- Վերբեռնում WC
- Կտրոններ
- Նոր ՀԴՄ կտրոն
- Կտրոնի վերադարձ
- Կտրոնի կրկնօրինակ
- WooCommerce ապրանքի eHDM կարգավորումներ
- Ինքնաշխատ տպում և PS Gateway պատվերներ
- eHDM – Հարցումների մատյան
- Կտրոնի նամակ և QR տվյալներ
- Կտրոնի զեղչերի կիրառման տրամաբանությունը և բանաձևերը
- Widget-ի նկարագրություն
- Կարևոր է իմանալ
Այս ուղեցույցը ներկայացնում է PlanetStudio Payment Gateway (eHDM Add-on)-ի կարգավորումն ու օգտագործումը։ Հիմնական վահանակը բացվում է WordPress-ի PS Gateway → eHDM բաժնից։ Լիցենզիայի կառավարումն առանձին է՝ PS Gateway → Add-ons բաժնում։
ՀՆԷՀ-ում էլեկտրոնային ՀԴՄ-ի գրանցում
Էլեկտրոնային ՀԴՄ գրանցելու և ՀԴՄ գրանցման համարը ստանալու համար անհրաժեշտ է տնտեսվարողի կողմից ՀՆԷՀ համակարգի Հաշվետվություններ բաժնից լրացնել u6 (101.Դիմում՝ ՀԴՄ գրանցելու մասին) դիմումը
Պաշտոնական ուղեցույցը տես այստեղ
Անհրաժեշտ է կատարել 1-ին կետը՝ ՀՆԷՀ-ում էլեկտրոնային ՀԴՄ-ի գրանցում
Տեղադրում և արտոնագրի ակտիվացում
eHDM-ը PS Gateway Core-ի հավելում է։ Նախ տեղադրեք և ակտիվացրեք PlanetStudio Payment Gateway-ը, ապա՝ eHDM Add-on-ը։ WooCommerce, PayForm կամ WPForms ինտեգրման համար անհրաժեշտ է նաև համապատասխան PS Gateway հավելումը։
- Բացեք PS Gateway → Add-ons բաժինը և գտեք eHDM հավելման քարտը։
- Add-on license բաժնում մուտքագրեք ձեր գնման կամ բաժանորդագրության համար տրամադրված ակտիվացման token-ը և սեղմեք Activate։ Ստուգեք, որ կարգավիճակը դարձել է Active։ Անհրաժեշտության դեպքում բաժանորդագրությունը թարմացնելու համար օգտագործեք Renew now հղումը։
Հավելման արտոնագրի ակտիվացումը և ՊԵԿ-ում ՀԴՄ-ի ակտիվացումը տարբեր գործողություններ են։ Արտոնագիրը կառավարվում է Add-ons բաժնում, իսկ ՊԵԿ-ի ՀԴՄ-ն՝ eHDM վահանակի Կարգավորումներ → ՀԴՄ Ակտիվացում բաժնում։
eHDM — Էլեկտրոնային ՀԴՄ վահանակ
Կարգավորումներ․ ՊԵԿ տվյալներ
Բացեք PS Gateway → eHDM → Կարգավորումներ։ Այստեղ լրացվում են ՊԵԿ-ի հետ կապի և կտրոնների ձևավորման հիմնական տվյալները։
- ՀԴՄ գրանցման համար՝ վերցրեք ձեր ՀՆԷՀ հաշվի ՀԴՄ-ների բաժնից։ Այն պետք է համապատասխանի օգտագործվող սերտիֆիկատին կցված ՀԴՄ-ի գրանցման համարին։
- Կազմակերպության ՀՎՀՀ՝ մուտքագրեք ձեր կազմակերպության ՀՎՀՀ-ն։
- Հարկման տեսակ՝ ընտրեք ձեր կազմակերպության հարկման տեսակը։
- Առաքման տողի ԱՏԳ կոդ՝ եթե WooCommerce պատվերի դեպքում առաքում կա, ՀԴՄ կտրոնում այն կներկայացվի առանձին տողով։ Մուտքագրեք առաքման տողի ԱՏԳ կոդը։
- Գանձապահի համար՝ գանձապահի կանխադրված համարն է։
- Հարցման հերթական համարի սկիզբ՝ ՊԵԿ հարցումների հաջորդականության մեկնարկային արժեքը։ Գործող միացման դեպքում այն անհարկի մի փոխեք։
- ՊԵԿ պատասխանների լեզուն՝ ընտրեք ՊԵԿ պատասխանների նախընտրելի լեզուն։
- Ներբեռնեք JKS ֆայլը և լրացրեք JKS ֆայլի գաղտնաբառ դաշտը։ Պահպանելուց հետո ստուգեք SSL Certificate և SSL Private Key ցուցիչները։
- Հարցումների լոգավորում՝ “Հարցումների մատյան”-ում կպահպանվեն ՊԵԿ բոլոր հարցումները և դրանց պատասխանները։
- Փորձարկման ռեժիմ՝ հարցումներն ուղարկվում են ՊԵԿ-ի փորձարկման միջավայր։ Օգտագործեք այդ միջավայրի համար նախատեսված տվյալներն ու ՊԵԿ-ի տրամադրած հասանելիությունը, անհրաժեշտության դեպքում՝ VPN-ը։ Իրական վաճառքների համար այս ռեժիմը պետք է անջատված լինի։
Սեղմեք Պահպանել։ Սերտիֆիկատի ֆայլը, մասնավոր բանալին, դրա գաղտնաբառն ու ակտիվացման token-ը մի հրապարակեք և մի ներառեք հաճախորդներին ուղարկվող նյութերում։
Կարգավորումներ > ՀԴՄ Ակտիվացում
ՀՆԷՀ-ում գրանցումից և կապի տվյալների կարգավորումից հետո բացեք Կարգավորումներ → ՀԴՄ Ակտիվացում և սեղմեք Կատարել ՀԴՄ ակտիվացում։ Արդյունքը ցուցադրվում է էջում։
Այս գործողությունն ուղարկում է ՀԴՄ-ի ակտիվացման հարցում ՊԵԿ։ Կապի խնդրի դեպքում ստուգեք ՀԴՄ-ի համարը, սերտիֆիկատն ու համապատասխան միջավայրի հասանելիությունը և մի եզրակացրեք, որ հավելման արտոնագիրն անպայման անգործուն է։
Փոխարժեքներ
Բացեք eHDM վահանակի Փոխարժեքներ ներդիրը։ Այստեղ սահմանվում են արտարժույթով պատվերների ՀԴՄ կտրոնները ՀՀ դրամով տպելու համար օգտագործվող փոխարժեքները։ Աջակցվում են AMD, USD, EUR և RUB արժույթները։ Փոխարժեքը ցույց է տալիս տվյալ արժույթի 1 միավորի արժեքը ՀՀ դրամով։ AMD-ի արժեքը միշտ 1 է։
Արտարժույթով պատվերների ՀԴՄ կտրոնների տպումը կանխադրված անջատված է, այդ թվում՝ գործող կայքում հավելումը թարմացնելուց հետո։ Այն միացնելու համար բացեք Փոխարժեքներ բաժինը, նշեք Արտարժույթով պատվերների կտրոնները տպել ՀՀ դրամով-ը և սեղմեք այդ նշատուփի կողքի Պահպանել կոճակը։ Անջատված վիճակում նոր AMD կտրոնները շարունակում են տպվել, իսկ նոր USD, EUR և RUB կտրոնները չեն տպվում։ Գոյություն ունեցող կտրոնների դիտումը, նամակով ուղարկումը, կրկնօրինակումը և վերադարձը մնում են հասանելի։ Փոխարժեքների ստացումը կամ դրանց ինքնաշխատ թարմացումը միացնելը չի միացնում արտարժութային կտրոնների տպումը։
| Սյուն | Նկարագրություն |
|---|---|
| Արժույթ | AMD, USD, EUR կամ RUB։ |
| Աղբյուր | Ընտրեք cba.am՝ ՀՀ Կենտրոնական բանկից պահպանված փոխարժեքն օգտագործելու համար, կամ Ձեռքով՝ սեփական փոխարժեք մուտքագրելու համար։ |
| Փոխարժեք | Գործող փոխարժեքը՝ 1 միավորի արժեքը ՀՀ դրամով։ CBA ռեժիմում դաշտը միայն դիտելու համար է, իսկ ձեռքով ռեժիմում՝ խմբագրման։ |
| Թարմացվել է | ՀՀ Կենտրոնական բանկից տվյալների ստացման կամ ձեռքով փոխարժեքի պահպանման կամ փոփոխման ամսաթիվն ու ժամը։ Դաշտը չի խմբագրվում։ |
ՀՀ Կենտրոնական բանկի և ձեռքով փոխարժեքներ
- Փոխարժեքներն անմիջապես ստանալու համար սեղմեք Թարմացնել ՀՀ Կենտրոնական բանկից։ Կոճակն աշխատում է նաև ինքնաշխատ թարմացումն անջատած վիճակում։
- Սեփական փոխարժեք սահմանելու համար տվյալ արժույթի աղբյուրը փոխեք Ձեռքով, խմբագրեք փոխարժեքը և սեղմեք արժույթների աղյուսակի տակ գտնվող Պահպանել կոճակը։ Ձեռքով ռեժիմին անցնելիս ցուցադրվող արժեքը պահպանվում է, որպեսզի կարողանաք անմիջապես խմբագրել այն։
- ՀՀ Կենտրոնական բանկի փոխարժեքներին վերադառնալու համար ընտրեք
cba.amև պահպանեք աղյուսակի տակ գտնվող կոճակով։ Դաշտում կցուցադրվի պահպանված բանկային փոխարժեքը՝ ոչ ակտիվ ձեռքով արժեքի փոխարեն։ - ՀՀ Կենտրոնական բանկից նոր տվյալներ ստանալը չի փոխարինում տվյալ արժույթի համար ընտրված ձեռքով փոխարժեքը։
- ՀՀ Կենտրոնական բանկի փոխարժեքի ամսաթիվը ցուցադրվում է առանձին՝ աղյուսակի վերևում։ Այն կարող է տարբերվել հավելման կողմից տվյալները ստանալու ամսաթվից և ժամից։
Ինքնաշխատ թարմացում
- Ինքնաշխատ թարմացումը կանխադրված անջատված է։ Եթե պատվերներն ընդունում եք միայն AMD-ով, կարող եք այն թողնել անջատված։ AMD կտրոնների համար փոխարժեքների կարգավորում անհրաժեշտ չէ։
- Ամենօրյա թարմացումը միացնելու համար նշեք Ինքնաշխատ թարմացում-ը, ընտրեք ժամը և սեղմեք ժամի դաշտի կողքի Պահպանել կոճակը։
- Կանխադրված ժամը 16:15-ն է՝ Asia/Yerevan ժամային գոտով։ Այն կախված չէ WordPress կայքի ժամային գոտուց։ Նախկինում պահպանված ժամը մնում է հասանելի։
- Ինքնաշխատ թարմացումն անջատած վիճակում ժամի դաշտը հասանելի չէ խմբագրման համար, սակայն դրա Պահպանել կոճակը մնում է ակտիվ, որպեսզի կարողանաք պահպանել ընտրությունը։ Անջատված վիճակը պահպանելիս հեռացվում են միայն eHDM փոխարժեքների ֆոնային առաջադրանքները, այդ թվում՝ սպասող կրկնակի փորձերը։ WordPress cron-ը և այլ հավելումների առաջադրանքները չեն անջատվում։
- Ժամի կողքի Պահպանել կոճակը պահպանում է ինքնաշխատ թարմացման կարգավորումն ու ժամանակացույցը։ Արժույթների աղյուսակի տակ գտնվող առանձին Պահպանել կոճակը պահպանում է փոխարժեքների աղբյուրներն ու ձեռքով արժեքները։
- Ձևի վերևում ցուցադրվում են վերջին հաջող թարմացումը, վերջին փորձը և հաջորդ պլանավորված թարմացումը։ Ինքնաշխատ թարմացումն անջատած վիճակում հաջորդ գործարկում չի պլանավորվում։
- WordPress cron-ը գործարկվում է կայք այցելելիս, եթե սերվերում առանձին cron կարգավորված չէ։ Այդ պատճառով փաստացի թարմացումը կարող է կատարվել ընտրված ժամից ավելի ուշ։
Ինքնաշխատ թարմացումն անջատելը չի ջնջում պահպանված փոխարժեքները կամ կտրոնների պատմությունը և չի անջատում արժույթի փոխարկումը։ Եթե արտարժութային կտրոնների տպումը միացված է, շարունակում է օգտագործվել ընտրված պահպանված փոխարժեքը։ Եթե ՀՀ Կենտրոնական բանկից թարմացումը ձախողվի, վերջին հաջող պահպանված տվյալները կմնան անփոփոխ։ Ստուգեք ցուցադրվող սխալը և թարմացման ամսաթվերը։ Վավեր փոխարժեքի բացակայության դեպքում արտարժույթով կտրոնը չի տպվի։
Արտարժույթով պատվերների կտրոնների տպում
- Ֆիսկալ կտրոնի և QR-ի վճարային գումարները միշտ ՀՀ դրամով են։ AMD պատվերները չեն փոխարկվում։ USD, EUR և RUB պատվերների համար կիրառվում է տպման պահին ընտրված պահպանված փոխարժեքը՝ ոչ թե պատվերի ստեղծման կամ վճարման պահի փոխարժեքը։
- Փոխարկումը գործում է և՛ ինքնաշխատ, և՛ ձեռքով տպման դեպքում։ WooCommerce պատվերների համար այն ներառում է ապրանքների գները, գումարային զեղչերը և առաքումը։ Քանակներն ու տոկոսային զեղչերը չեն փոխվում։
- Ապրանքային կտրոնի դրամային ընդհանուր գումարը հաշվարկվում է փոխարկված տողերից և զեղչերից։ Գումարները կլորացվում են մինչև երկու տասնորդական նիշ, ուստի պատվերի ընդհանուր գումարի ուղիղ փոխարկման համեմատ հնարավոր է փոքր տարբերություն։
- PayLink, PayForm և WPForms՝ առանց ապրանքների կանխավճարային կտրոնների դեպքում վճարման գումարը փոխարկվում է անմիջապես ՀՀ դրամի։
- Սկզբնական պատվերն ու բանկային վճարումը պահպանում են իրենց սկզբնական գումարը և արժույթը։ Կտրոնի պատմության մեջ պահպանվում են սկզբնական արժույթը, գումարը և կիրառված փոխարժեքը։ Հետագա փոխարժեքի փոփոխությունը չի վերահաշվարկում արդեն տպված կտրոնը։
- Մինչև առաջին արտարժութային կտրոնի տպումը միացրեք արտարժութային կտրոնների տպումը և ստացեք ՀՀ Կենտրոնական բանկի փոխարժեքները կամ պահպանեք վավեր ձեռքով փոխարժեք։ Տպման պահին բանկից նոր փոխարժեք չի հարցվում։
- eHDM-ի փոխարժեքների կարգավորումները անկախ են խանութում արժույթ փոխարկող հավելումից։ Դրանք չեն փոխում ապրանքների ցուցադրման արժույթը կամ վճարային համակարգով գանձվող գումարը։
Օրինակ՝ պայմանական 360.93 փոխարժեքով և առանց ապրանքային տողերի կլորացման տարբերությունների՝ 10 USD վճարման համար կտպվի 3,609.30 ՀՀ դրամ ֆիսկալ կտրոն։ Փաստացի կիրառված փոխարժեքը տեսանելի է կտրոնի Փոխարժեք սյունակում։
ՀԴՄ բաժիններ
Բացեք ՀԴՄ բաժիններ, ընտրեք անհրաժեշտ հարկման բաժինը կամ բաժինները և սեղմեք Փոխանցել ՊԵԿ համակարգ։ Հասանելի տարբերակներն են ԱԱՀ-ով հարկվող, ԱԱՀ-ով չհարկվող, Շրջանառության հարկ վճարող և Միկրոձեռնարկատիրություն։ Ընտրությունը պետք է համապատասխանի ձեր ՀԴՄ-ի և գործունեության տվյալներին։
Ապրանքացանկի ստացում
Եթե ապրանքներն արդեն գրանցված են ՀՆԷՀ-ում, նախ կարգավորեք ՀԴՄ բաժինները, ապա բացեք Ապրանքացանկի ստացում։ Ընտրեք բաժինը և սեղմեք Ստանալ ապրանքացանկը ՀՆԷՀ համակարգից։ Հաջող պատասխանի դեպքում ակտիվ ապրանքների ցանկը պահպանվում է JSON ձևաչափով՝ հետագայում WooCommerce ներմուծելու համար։ Սա պարտադիր քայլ չէ, եթե արդեն ունեք WooCommerce ապրանքներ և դրանց eHDM տվյալները լրացնում եք ձեռքով։
Վերբեռնում WC
Վերբեռնում WC բաժնում ընտրեք նախկինում ստացված ցանկը և սեղմեք Վերբեռնել WooCommerce։ Գործողությունը ցանկի ապրանքներից ստեղծում է նոր, հրապարակված WooCommerce ապրանքներ։
ՊԵԿ-ից ստացված դաշտերը կլրացվեն ինքնաշխատ, սակայն կարևոր է նշել, որ ՊԵԿ-ը չի փոխանցում բոլոր անհրաժեշտ դաշտերը։ Այդ դաշտերը հարկավոր է լրացնել ձեռքով։
Կարևոր է․ գոյություն ունեցող ապրանքները չեն թարմացվում։ Կրկին ներմուծելիս կստեղծվեն նոր ապրանքներ։ Նախ ստուգեք ցանկը՝ կրկնվող ապրանքներ չստեղծելու համար, իսկ ներմուծումից հետո լրացրեք բացակայող ԱՏԳ կոդն ու չափման միավորը և ստուգեք գները։
Կտրոններ
Կտրոններ բաժնում ցուցադրվում են ընթացիկ test/live ռեժիմի պահպանված ֆիսկալ գրառումները՝ վաճառքի կտրոններ, կրկնօրինակներ և վերադարձներ։ Կարող եք դիտել ՊԵԿ-ի պատասխանը, ապրանքները, QR-ը և կիրառված փոխարժեքը, ինչպես նաև անցնել համապատասխան վճարման կամ WooCommerce պատվերի էջին։
“Էկրանի կարգավորումներ” բաժնում կարող եք ընտրել, թե որ սյունակներն են անհրաժեշտ ցուցադրել և նշել տողերի ցուցադրվող քանակը։
Կտրոնների աղյուսյակի դաշտեր
| Սյուն | Նկարագրություն |
|---|---|
| ID | Կտրոնի պահպանված գրառման եզակի ներքին համարը։ Տարբերվում է ՊԵԿ-ի ֆիսկալ կտրոնի համարից։ |
| LogID | Համապատասխան հարցման մատյանի գրառման հղումը։ Մանրամասները հասանելի են, եթե հարցման լոգը պահպանվել է։ |
| vPOS ID | Բանկային վճարման կամ բանկային պատվերի նույնացուցիչը։ Հղումը բացում է համապատասխան վճարումը PS Gateway պատվերներում։ Սա PSPG-ի ներքին պատվերի համարը չէ։ |
| PSPG | PS Gateway-ի ներքին պատվերի համարը և համապատասխան վճարման հղումը՝ առկայության դեպքում։ |
| Source | Վճարման կամ պատվերի աղբյուրը, օրինակ՝ WooCommerce, PayLink, PayForm կամ WPForms։ |
| Source ID | Աղբյուրի օբյեկտի համարը, օրինակ՝ WooCommerce պատվերի համարը։ Աջակցվող աղբյուրների դեպքում նաև հղում է։ |
| Հարցում | Պահպանված գործողության տեսակը՝ կտրոն, կրկնօրինակ կամ վերադարձ։ |
| Կտրոնի համար | ՊԵԿ-ից ստացված ֆիսկալ համարը։ Տարբեր ՀԴՄ-ների համար այն կարող է կրկնվել։ |
| Կտրոն | ՊԵԿ-ի պահպանված պատասխանը՝ JSON ձևաչափով։ |
| Հարցման հերթական համար | ՊԵԿ ուղարկված հարցման հաջորդականության համարը։ |
| Փոխարժեք | Կտրոնի հետ պահպանված փոխարժեքը, աղբյուրն ու փոխարժեքի ամսաթիվը, օրինակ՝ 1 USD = 360.93 AMD։ AMD-ի համար փոխարժեքը 1 է։ Առանց պահպանված փոխարկման տվյալների հին գրառումների դեպքում կարող է ցուցադրվել գծիկ։ |
| Անկանխիկ վճարված գումար | Տպման հարցման անկանխիկ վճարման գումարը՝ ՀՀ դրամով։ |
| Կանխիկ վճարված գումար | Տպման հարցման կանխիկ վճարման գումարը՝ ՀՀ դրամով։ |
| Մանրադրամ | ՊԵԿ-ի պատասխանի մանրադրամի գումարը՝ առկայության դեպքում։ |
| Մասնակի վճարման գումար | Մասնակի վճարման համար փոխանցված գումարը։ |
| Կանխավճարի օգտագործման գումար | Տպման հարցման մեջ օգտագործված կանխավճարի գումարը։ |
| Գանձապահի համար | Հարցման մեջ նշված գանձապահը։ |
| Կտրոնի տպման ռեժիմ | Ապրանքներ կամ կանխավճար։ |
| Գնորդի ՀՎՀՀ | Գնորդի ՀՎՀՀ-ն՝ հարցման մեջ առկայության դեպքում։ |
| Օգտագործված կանխավճար | ՊԵԿ-ից ստացված օգտագործված կանխավճարի տվյալը՝ տվյալ գործողության պատասխանում առկայության դեպքում։ |
| Տեսակ | ՊԵԿ-ի saleType դասակարգումը՝ առկայության դեպքում։ |
| Գործարք | ՊԵԿ-ի receiptType դասակարգումը՝ առկայության դեպքում։ |
| Ենթագործարք | ՊԵԿ-ի receiptSubType դասակարգումը՝ օրինակ՝ վաճառք կամ կանխավճարի օգտագործում։ |
| Անկանխիկ վերադարձվող գումար | Ֆիսկալ վերադարձի անկանխիկ մասը՝ ՀՀ դրամով։ |
| Առձեռն վերադարձվող գումար | Ֆիսկալ վերադարձի կանխիկ մասը՝ ՀՀ դրամով։ |
| Ընդամենը վերադարձվող գումար | Վերադարձի գրառման ընդհանուր գումարը՝ առկայության դեպքում։ |
| Ապրանքների ցանկ | Պահպանված ապրանքային տողերը, գները, քանակներն ու զեղչերը՝ JSON ձևաչափով։ |
| Ֆիսկալ | ՊԵԿ-ից ստացված ֆիսկալ համարը։ |
| QR | Տվյալ պահպանված կտրոնի QR պատկերը։ |
| Կտրոնի գրանցման ամսաթիվ | Հավելման բազայում գրառման ստեղծման ամսաթիվն ու ժամը։ |
| Գործողություններ | Տվյալ գրառման համար առաջարկվող գործողությունները՝ օրինակ՝ վերադարձ, կրկնօրինակ կամ նամակի ուղարկում։ |
PSPG և vPOS ID դաշտերը կարող են դատարկ լինել կանխիկ կամ առաքման պահին վճարվող WooCommerce պատվերի կտրոնների, ինչպես նաև առանց PSPG վճարման ձեռքով տպված WooCommerce կտրոնների դեպքում։ Դա նորմալ է․ WooCommerce պատվերը նույնականացվում է Source և Source ID դաշտերով։ Առանձին WC ID սյունակ այլևս չի առաջարկվում էկրանի կարգավորումներում և չի ներառվում CSV-ում։ Կտրոնի պահպանված փոխարժեքը պատմական տվյալ է, ոչ թե «Փոխարժեքներ» ներդիրի վերջին արժեքը։
ID-ն բազայի եզակի գրառումն է, իսկ Կտրոնի համար-ը՝ ՊԵԿ-ի ֆիսկալ համարը։ Տարբեր ՀԴՄ-ների կամ ռեժիմների համար ֆիսկալ համարները կարող են կրկնվել։ QR-ն ու նամակը դիտելիս կամ ուղարկելիս օգտվեք կոնկրետ գրառման գործողություններից։ Կտրոնի նամակի կրկնակի ուղարկումը նոր ֆիսկալ կտրոն չի տպում։
Արտահանում CSV ձևաչափով
- Կտրոնների աղյուսակի վերևում սեղմեք Արտահանել հղումը։ Եթե հասանելի է Ջնջել բոլորը հղումը, արտահանման հղումը գտնվում է դրա կողքին։
- Բացված պատուհանում ընտրեք Սկսած և Մինչև ամսաթվերը։ Կանխադրված ընտրված է նախորդ օրացուցային ամիսը։ Զտումն իրականացվում է կտրոնի գրանցման ամսաթվով և ներառում է նշված երկու ամսաթվերը։
- Սեղմեք Արտահանել CSV։ Կներբեռնվի UTF-8 կոդավորմամբ CSV ֆայլ, որը կարելի է բացել Excel-ում և այլ աղյուսակային ծրագրերում։
- Արտահանվում են պայմաններին համապատասխանող բոլոր տողերը, ոչ միայն աղյուսակի ընթացիկ էջը։ Հաշվի է առնվում eHDM-ի ընթացիկ փորձարկման կամ իրական ռեժիմը։ Եթե կտրոնների էջը բացված է որոշակի կտրոնի զտմամբ, արտահանման համար նույնպես կիրառվում է այդ սահմանափակումը։
- Ֆայլում ներառվում են PSPG, Source, Source ID, բանկային vPOS ID, ապրանքների տվյալները և պահպանված փոխարկման ամփոփ տվյալները։ «Էկրանի կարգավորումներ»-ում տեսանելի սյունակների փոփոխությունը չի փոխում CSV-ի սյունակները։
Կտրոնի յուրաքանչյուր ապրանք արտահանվում է առանձին տողով։ Օրինակ՝ երեք ապրանք ունեցող կտրոնը կստեղծի նույն կտրոնի երեք տող։ Առանց ապրանքների կտրոնի համար կստեղծվի մեկ տող՝ ապրանքային դատարկ դաշտերով։
| Կտրոնի համար | Ապրանքի անվանում |
|---|---|
| 1001 | Ապրանք 1 |
| 1001 | Ապրանք 2 |
| 1001 | Ապրանք 3 |
Փոխարկման ամփոփ սյունակներն են՝ Original Currency, Original Amount, Exchange Rate (AMD per unit), Exchange Rate Date և Exchange Rate Source։ Փոխարկման ամբողջական JSON-ը չի ներառվում։ Կտրոնի ընդհանուր գումարները կրկնվում են յուրաքանչյուր ապրանքային տողում․ դրանք մի գումարեք որպես առանձին կտրոններ։ Կրկնօրինակներն ու վերադարձները վերլուծելիս հաշվի առեք նաև հարցման տեսակը։
Նոր ՀԴՄ կտրոն
Կարող եք ձեռքով տպել WooCommerce պատվերի կտրոն, ստանալ կանխավճար առանց ապրանքների կամ օգտագործել նախկինում ստացված կանխավճարը WooCommerce պատվերի համար։ Տպելուց առաջ համոզվեք, որ վճարումը փաստացի ստացվել է, և ստուգեք՝ արդյոք ֆիսկալ կտրոնն արդեն գոյություն ունի։ Գոյություն ունեցող կտրոնի պատճենի համար օգտվեք «Կրկնօրինակ» գործողությունից՝ նույն վճարման համար նոր կտրոն տպելու փոխարեն։
Կանխավճար առանց ապրանքների
- Օգտագործեք այս տարբերակը առանց WooCommerce ապրանքների PS Gateway վճարման համար, օրինակ՝ PayLink, PayForm կամ WPForms, երբ կանխավճարային ֆիսկալ կտրոնն անհրաժեշտ է տպել ձեռքով։
- Մուտքագրեք վճարման բանկային պատվերի համարը / vPOS ID-ն՝ PS Gateway պատվերներից։ Այս ձևը վճարումը որոնում է բանկային նույնացուցիչով, ոչ թե PSPG-ի ներքին թվային պատվերի համարով։
WooCommerce պատվերների կտրոններ
- Օգտագործեք այս տարբերակը կանխիկ կամ առաքման պահին վճարվող WooCommerce պատվերի համար, ինչպես նաև այն դեպքում, երբ պատվերի կտրոնն ինքնաշխատ չի տպվել։ Ձևը տպում է պատվերի ապրանքները և, առկայության դեպքում, առաքման տողը պարունակող կտրոն։
- Մուտքագրեք “WooCommerce” պատվերի համարը՝ այն կարող եք գտնել “WooCommerce”-ի պատվերների մատյանում։
- Ընտրեք վճարման եղանակը՝ Կանխիկ, Անկանխիկ կամ Անկանխիկ այլ տերմինալով։ Անհրաժեշտության դեպքում նշեք բանկային վճարման նույնացուցիչը։
- Ընտրեք WooCommerce պատվերի կարգավիճակը, որը կկիրառվի ՀԴՄ կտրոնի հաջող տպումից հետո։
Հաջող տպումից և կտրոնի պահպանումից հետո eHDM-ը փորձում է առանձին նամակ ուղարկել WooCommerce պատվերում պահպանված հաճախորդի էլեկտրոնային հասցեին։ Ստուգեք, որ պատվերում վավեր հասցե կա։ Պատվերի կարգավիճակի փոփոխությունը կարող է առաջացնել նաև սովորական WooCommerce նամակներ՝ ըստ ձեր կարգավորումների։ Պատվերի արժույթը վերցվում է ինքնաշխատ, իսկ արտարժութային գումարները փոխարկվում են ՀՀ դրամի՝ ընտրված պահպանված փոխարժեքով։
Կանխավճարի օգտագործում
- Բացեք Նոր ՀԴՄ կտրոն → Կանխավճարի օգտագործում, երբ նախկինում ստացված կանխավճարի հաշվին պետք է ձևակերպել WooCommerce պատվերի ապրանքների կտրոնը։
- Մուտքագրեք “WooCommerce” պատվերի համարը՝ այն կարող եք գտնել “WooCommerce”-ի պատվերների մատյանում։
- Ընտրեք “WooCommerce”-ի պատվերի կարգավիճակը։
Ապրանքներն ու օգտագործվող կանխավճարի գումարը վերցվում են նշված WooCommerce պատվերից։ Այս ձևը հին կանխավճարային կտրոնի համար չի պահանջում և չի ընտրում նախկին կտրոնի ապրանքները։ Այն նաև չի վարում տարբեր կանխավճարների ընդհանուր մնացորդի առանձին հաշվառում․ նախ ստուգեք, որ տվյալ պատվերի համար բավարար կանխավճար կա։
Հաջող տպումից հետո կիրառվում է ընտրված WooCommerce կարգավիճակը և կատարվում է կտրոնի նամակի ուղարկման փորձ։ Արտարժութային պատվերի դեպքում անհրաժեշտ է միացված լինի արտարժութային տպումը․ կիրառվում է տպման պահին ընտրված պահպանված փոխարժեքը, ոչ թե նախկին կանխավճարի կտրոնի փոխարժեքը։
Կտրոնի վերադարձ
Կտրոնի վերադարձ կատարելու համար՝
- Մուտքագրեք կտրոնի համարը կամ
- “Կտրոններ” բաժնում սեղմեք տվյալ կտրոնի “Վերադարձ” կոճակը։
Սեղմեք Ստանալ կտրոնի վերաբերյալ տեղեկատվություն ՊԵԿ-ից։ Ստուգեք վերադարձվող կտրոնի տվյալներն ու գումարները, ապա էջի ներքևում սեղմեք Վերադարձնել։ Ներկայիս ձևը փոխանցում է ցուցադրված վերադարձման ենթակա ապրանքներն ու դրանց քանակները․ սա առանձին ապրանք կամ մասնակի քանակ ընտրելու ձև չէ։
Վերադարձի գումարները վերցվում են սկզբնական ֆիսկալ կտրոնից՝ ՀՀ դրամով։ Նույնիսկ եթե պատվերը վճարվել է USD, EUR կամ RUB արժույթով, վերադարձը մի վերահաշվարկեք նոր փոխարժեքով։ Ֆիսկալ վերադարձը ինքնին բանկային գումարի վերադարձ չէ․ վճարման վերադարձն անհրաժեշտ է կատարել համապատասխան վճարային համակարգում։ Վերադարձի կտրոնի QR նամակը հաճախորդին չի ուղարկվում։
Կտրոնի կրկնօրինակ
Կտրոնի կրկնօրինակը տպելու համար՝
- Մուտքագրեք կտրոնի համարը կամ
- “Կտրոններ” բաժնում սեղմեք տվյալ կտրոնի “Կրկնօրինակ” կոճակը։
Բացեք Կտրոնի կրկնօրինակ, մուտքագրեք կտրոնի համարը և սեղմեք Տպել կտրոնի կրկնօրինակը։ Կրկնօրինակն օգտագործում է արդեն գոյություն ունեցող ֆիսկալ կտրոնը․ պատվերը նոր վաճառք չի դառնում և չի փոխարկվում ընթացիկ փոխարժեքով։ Կրկնօրինակի հարցումը պահպանվում է պատմության մեջ որպես առանձին գործողություն։
WooCommerce ապրանքի eHDM կարգավորումներ
Բացեք WooCommerce ապրանքի խմբագրման էջը։ Product data (Ապրանքի տվյալներ) հատվածի ձախ ցանկից ընտրեք առանձին eHDM ներդիրը։ Այստեղ են ապրանքի կամ ծառայության ֆիսկալ տվյալները․ դրանք այլևս General ներդիրում չեն։
- Ապրանքի անվանում՝ ֆիսկալ կտրոնում օգտագործվող անվանումը՝ առավելագույնը 50 նիշ։ Եթե ապրանքը գրանցված է ՀՆԷՀ-ում, լրացրեք համապատասխան կրճատ անվանումը։ Այն առանձին է WooCommerce ապրանքի վերնագրից։
- Կոդ՝ ապրանքի կամ ծառայության ֆիսկալ կոդը։ Լրացրեք ձեր հաշվառման համապատասխան արժեքը։
- ԱՏԳ կոդ՝ ապրանքի կամ ծառայության դասակարգման կոդը։ Օգտագործեք համապատասխան ՀՀ ՊԵԿ պաշտոնական ցանկերը։ Կոդը պահպանում է իր ձևաչափը, օրինակ՝
62.01։ - Չափման միավոր՝ օրինակ՝ հատ, կգ կամ լիտր։ Կարող եք ընտրել առաջարկվող արժեքներից կամ մուտքագրել համապատասխան միավորը։
- ՀԴՄ բաժին՝ այն հարկման բաժինը, որով պետք է ձևավորվի տվյալ ապրանքի կտրոնի տողը։ Սա չի փոխում WooCommerce-ի հարկային կարգավորումները։
Ապրանքը կարելի է պահպանել նաև առանց eHDM տվյալների։ Դատարկ դաշտերը նշվում են մեղմ կարմիր շրջանակով և «Պարտադիր է ՀԴՄ կտրոնի տպման համար։» հուշումով։ Սա տեսողական հիշեցում է, ոչ թե ապրանքի պահպանումը արգելող ստուգում։ Դաշտը լրացնելիս նշումն անհետանում է։ Արդեն լրացված դաշտը մաքրելու և ապրանքը թարմացնելու դեպքում պահպանվում է դատարկ արժեքը, ոչ թե հին տվյալը։
ԱՏԳ դաշտի տակ ցուցադրվում է ներառված տեղեկատուում գտնված կոդի անվանումը։ Եթե կոդը ցանկում չկա, կտեսնեք ստուգելու առաջարկ, սակայն պահպանումը կամ տպման հարցումն այդ պատճառով չեն արգելափակվում։ Տեղեկատուն միավորում է ապրանքների և ծառայությունների կոդերը և չի հանդիսանում ՊԵԿ-ի առցանց վավերացման ծառայություն։ Աղբյուրի հղումն ու տվյալների վերցման ամսաթիվը նշված են դաշտի տակ։
Մինչև վաճառքը լրացրեք բոլոր անհրաժեշտ ֆիսկալ տվյալները։ Հավելումը տպման հարցումը պատրաստում է պահպանված արժեքներով․ բացակայող կամ սխալ տվյալները կարող են հանգեցնել ՊԵԿ-ի մերժման, որի մանրամասները երևում են հարցումների մատյանում։ eHDM դաշտերը դատարկ թողնելը չի նշանակում տվյալ ապրանքի համար ֆիսկալ տպման անջատում։ Վարիացիայի առանձին ֆիսկալ արժեքի բացակայության դեպքում օգտագործվում է մայր ապրանքի համապատասխան արժեքը։
Ինքնաշխատ տպում և PS Gateway պատվերներ
Աջակցվող PS Gateway ինտեգրման միջոցով վճարումը հաջող հաստատվելուց հետո eHDM-ը նախաձեռնում է ֆիսկալ կտրոնի տպումը։ WooCommerce պատվերի դեպքում օգտագործվում են ապրանքային տողերը և, եթե վճարովի առաքում կա, Առաքում առանձին տողը։ PayLink, PayForm և WPForms վճարումների համար կիրառվում է առանց ապրանքների կանխավճարի ռեժիմը։
- Առաքման պահին կանխիկ վճարվող պատվերի պարզապես ստեղծումը ինքնին PS Gateway-ի հաջող վճարում չէ։ Անհրաժեշտ պահին օգտագործեք WooCommerce պատվերի ձեռքով տպման ձևը։
- GiveWP նվիրատվությունները չեն ընդգրկվում ֆիսկալ կտրոնների ինքնաշխատ տպման հոսքում։
- USD, EUR և RUB կտրոնները տպվում են միայն արտարժութային տպման կարգավորումը միացված լինելու և վավեր պահպանված փոխարժեքի առկայության դեպքում։
- PS Gateway → Orders էջի eHDM սյունակից կարող եք ստուգել պահպանված կտրոնն ու անցնել Կտրոններ բաժնի համապատասխան գրառումներին։ Հակադարձ հղումները կտրոնից տանում են վճարման կամ սկզբնական պատվերի էջին։
- Ձեռքով նոր տպումը առանձին ֆիսկալ գործողություն է։ Նախ ստուգեք՝ կտրոնն արդեն գոյություն ունի՞։ Պատճենի համար օգտագործեք կրկնօրինակը, իսկ հաճախորդին նույն կտրոնը նորից ուղարկելու համար՝ QR նամակի կրկնակի ուղարկումը։
eHDM — Հարցումների մատյան
Հարցումների լոգավորում-ը միացված լինելու դեպքում Հարցումների մատյան բաժնում պահպանվում են ՊԵԿ-ին ուղարկված հարցումներն ու պատասխանները՝ ընտրված test/live ռեժիմով։ Log պատկերակի վրա սեղմելով՝ կարող եք բացել ամբողջական JSON-ը։ Ընտրեք Բոլորը կամ Միայն սխալները։ Կտրոնի հետ կապված մատյանը բացվում է նաև դրա LogID հղումով։
Ստուգեք հարցման տվյալները, ՊԵԿ-ի code/errorMessage դաշտերը կամ կապի խափանման մանրամասները։ Օրինակ՝ սխալ ՀԴՄ-ի համարն ու ոչ վավեր դաշտերը տարբեր խնդիրներ են սերվերի անհասանելիությունից կամ VPN-ի բացակայությունից։ Միայն ընդհանուր էջային ծանուցմամբ մի որոշեք՝ նոր կտրոն տպել, թե ոչ․ նախ ստուգեք կտրոնների պատմությունն ու հարցման պատասխանը։
Կտրոնի նամակ և QR տվյալներ
Կտրոնի նամակը պարունակում է QR պատկերը և ՊԵԿ-ի QR տվյալներից ձևավորված ընթեռնելի դաշտերը՝ կտրոնի համարը, ամսաթիվն ու ժամը, ֆիսկալ համարը, հարկ վճարողի նույնացուցիչներն ու վճարման գումարները՝ դրանց առկայության դեպքում։ Ֆիսկալ գումարները ՀՀ դրամով են։
WooCommerce-ի դեպքում eHDM-ի առանձին նամակն ուղարկվում է պատվերում պահպանված հաճախորդի էլեկտրոնային հասցեին։ Այլ PSPG վճարումների դեպքում օգտագործվում է վճարման մատյանի աջակցվող գրառումներում պահպանված հաճախորդի հասցեն՝ առկայության դեպքում։ Հակառակ դեպքում օգտագործվում է ընթացիկ օգտատիրոջ կամ կայքի ադմինիստրատորի հասցեն։ Նամակի փաստացի առաքումը կախված է WordPress-ի փոստային կարգավորումներից։
Կտրոնի գործողություններից կարող եք կրկին ուղարկել QR նամակը։ WooCommerce պատվերում նույնպես հասանելի է ֆիսկալ կտրոնի QR նամակը կրկին ուղարկելու գործողությունը։ Նամակի կրկնակի ուղարկումը նոր ֆիսկալ կտրոն չի ստեղծում։
Նամակի QR պատկերն ու ընթեռնելի տվյալները վերցվում են նույն պահպանված ֆիսկալ գրառումից։ ՀԴՄ-ի փոփոխությունից հետո հին կտրոններն էլ հնարավոր է դիտել և կրկին ուղարկել դրանց կոնկրետ գրառման գործողությամբ։ Վերադարձի կտրոնների նամակները չեն ուղարկվում։ Եթե ուղարկումը չի հաջողվել, դա չի նշանակում, որ արդեն տպված ֆիսկալ կտրոնը չեղարկվել կամ չի տպվել․ ստուգեք հասցեն և փոստային համակարգը, ապա կրկին ուղարկեք նույն կտրոնը։
Կտրոնի զեղչերի կիրառման տրամաբանությունը և բանաձևերը
Էլեկտրոնային ՀԴՄ գրանցելու և վեբ ծառայությանը ինտեգրվելու պաշտոնական ձեռնարկով, հնարավոր է կիրառել երկու տեսակի զեղչ, որոնք իրենց հերթին ունեն երկու ենթատեսակ:
- Ապրանքի զեղչ / discount
- % PERCENT, տոկոսային զեղչ՝ discountType = 1
- PRICE (Դ), ամեն ապրանքի / միավորի համար արվող դրամային զեղչ՝ discountType = 2. Հաշվարկ՝ (initial_price – discount) * quantity
- TOTAL (Σ), ընդհանուր քանակից հանվող զեղչ՝ discountType = 4․ Հաշվարկ՝ (price*quantity) –discount
- Ապրանքի լրացուցիչ զեղչ / additionalDiscount
additionalDiscountType = 16՝ գումարային զեղչ, որը հանվում է ապրանքի հիմնական զեղչից հետո հաշվարկված տողի գումարից։- % — ային զեղչի դեպքում ընդունում է 8 արժեքը
e-HDM plugin-ի կիրառման տարբերակներ՝ զեղչերի համար
e-HDM plugin-ը կիրառում է երկու տարբերակ՝ զեղչերի տարբեր տեսակի կարգավորման համար՝
1-ին տարբերակ՝ discountType = 2
Այս տարբերակը կիրառվում է այն դեպքում, երբ WooCommerce պրոդուկտի վրա կիրառվել է “Sale price”:
Սա նշանակում է, որ երբ ապրանքի համար սահմանված է զեղչի գինը, այն կգործի այս մեխանիզմով։
Ինչպես է աշխատում
Կտրոնի ձևավորման ժամանակ ապրանքի սովորական և գործող գների տարբերությունը ներկայացվում է որպես ապրանքի զեղչ։ Եթե պատվերի ապրանքային տողում առկա են eHDM-ի պահպանված գնային տվյալները, օգտագործվում են այդ գները՝ ապրանքի քարտի ընթացիկ գների փոխարեն։
2-րդ տարբերակ՝ additionalDiscountType = 16
Այս տարբերակը կիրառվում է, երբ օգտագործվում են “Coupons” (Զեղչերի կտրոններ) WooCommerce-ում։
Կտրոնները կարող են կիրառվել որպես լրացուցիչ զեղչեր, որոնք գործադրում են համակարգը՝ հիմնվելով կիրառվող կտրոնի տվյալների վրա։
Ինչպես է աշխատում
Եթե պատվերի ապրանքային տողի վերջնական գումարը տարբերվում է մինչև կտրոնային զեղչը եղած գումարից, կազմվում է լրացուցիչ գումարային զեղչ՝ additionalDiscountType = 16։ Այն ներկայացվում է ամբողջ տողի համար՝ հիմնական ապրանքային զեղչից հետո։ Արտարժութային կտրոնում գումարային գներն ու զեղչերը փոխարկվում են ՀՀ դրամի, իսկ տոկոսային արժեքները մնում են տոկոսներ։
Հատուկ դեպքեր․ WooCommerce-ի հարկերը միացված լինելու, պատվերի ներսում ապրանքային գների ձեռքով խմբագրման, լրացուցիչ վճարների կամ բարդ գնային հավելումների դեպքում նախ փորձարկեք ձեր կոնկրետ պատվերը և համեմատեք ֆիսկալ տողերն ու վճարված գումարը։ ՀԴՄ բաժնի ընտրությունը ինքնին չի նշանակում WooCommerce-ի հարկային հաշվարկների ամբողջական տեղափոխում կտրոն։ Հին պատվերների համար, որտեղ գնային պատկերը չի պահպանվել, ապրանքի քարտի հետագա գների փոփոխությունն էլ կարող է ազդել կտրոնի վրա։
Widget-ի նկարագրություն
WordPress վահանակի PS Gateway eHDM: Missing Receipts widget-ն օգնում է գտնել վճարված PSPG պատվերները, որոնց համար ֆիսկալ կտրոն չկա։ Սա ստուգման համար նախատեսված ցանկ է, ոչ թե ֆիսկալ հասույթի ամբողջական հաշվետվություն։
Արտարժույթով պատվերները բացակայող կտրոնների ցանկում ներառվում են միայն այն դեպքում, երբ միացված է արտարժութային կտրոնների տպման կարգավորումը։
- Ընտրեք ժամանակահատվածը՝ Last 7 days, Last 30 days կամ All time։
- Ցուցադրվում է մինչև տասը համապատասխան պատվեր՝ PSPG պատվերի համարով, աղբյուրով, վճարման սկզբնական գումարով և վճարման ժամով։ Վերևի թիվը ցուցադրված ցանկի քանակն է, ոչ թե բոլոր բացակայող կտրոնների ընդհանուր հաշվարկը։
- Widget-ը հետևում է eHDM-ի փորձարկման ռեժիմին․ փորձարկման ռեժիմում ստուգվում են միայն փորձարկման պատվերներն ու դրանց փորձարկման կտրոնները, իսկ իրական ռեժիմում՝ իրական պատվերներն ու դրանց իրական կտրոնները։ Նույն պատվերի այլ ռեժիմի կտրոնը չի փոխարինում անհրաժեշտ կտրոնին։
- GiveWP նվիրատվությունները և հին՝ legacy աղբյուրով պատվերները չեն ընդգրկվում բացակայող կտրոնների ցանկում։ Սպասող կամ ձախողված վճարումները չեն դիտարկվում որպես կտրոն պահանջող վճարված պատվերներ։
- View Orders և Receipts հղումներով ստուգեք վճարումն ու դրա ֆիսկալ գրառումները՝ նախքան ձեռքով տպելը։
- Ցուցադրվող գումարը վճարման սկզբնական արժույթով է։ Արտարժույթով վճարման ֆիսկալ կտրոնը տպվում է ՀՀ դրամով՝ ընտրված պահպանված փոխարժեքով։
Կարևոր տեղեկություններ՝
- eHDM հավելումն ընդլայնում է PlanetStudio Payment Gateway (PS Gateway Core)-ի հնարավորությունները։ WooCommerce, PayForm կամ WPForms օգտագործելիս միացրեք նաև համապատասխան ինտեգրման հավելումը։
- Արտոնագրի վիճակը ստուգեք PS Gateway → Add-ons բաժնում, իսկ ՀԴՄ-ի ու սերտիֆիկատի տվյալները՝ PS Gateway → eHDM → Կարգավորումներ բաժնում։ Մի ակտիվացման հաջող արդյունքը չի փոխարինում մյուսին։
- Ապրանքի կամ ապրանքների վրա զեղչի կամ զեղչերի կիրառման արդյունքում հնարավոր է ստանաք գին՝ 0 դրամ, 0 դրամով ՀԴՄ կտրոն տպել չի ստացվի։
- Կապի խափանման դեպքում նախ ստուգեք կտրոնների պատմությունը, հարցման պատասխանը և անհրաժեշտության դեպքում ՀՆԷՀ տվյալները։ Միայն հաստատված բացակայության դեպքում ձեռքով տպեք նոր կտրոն․ կապի սխալը կամ չստացված նամակը ինքնին չեն ապացուցում, որ ՊԵԿ-ում կտրոն չի ստեղծվել։
- Եթե վճարումը վերադարձվում կամ չեղարկվում է, կտրոնի վերադարձը պետք է իրականացվի ինքնուրույն եղանակով
- Էլեկտրոնային ՀԴՄ ֆիսկալ հասույթը և մնացած հաշվետվությունները վերցվում են ՀՆԷՀ հաշվի ՀԴՄ ներ բաժնից։
- Աջակցվող պատվերի արժույթներն են AMD, USD, EUR և RUB։ Ֆիսկալ կտրոնը ՀՀ դրամով է։ Արտարժույթով կտրոն տպելուց առաջ ստուգեք պահպանված փոխարժեքը և դրա ամսաթիվը։ Եթե ցանկանում եք ամենօրյա թարմացում, այն պետք է միացնեք առանձին։
- Եթե WooCommerce պատվերի ապրանքային տողը ստեղծելիս eHDM-ը պահպանել է գնային տվյալները, ապրանքի քարտի հետագա փոփոխությունները չեն փոխարինում պահպանված սովորական և գործող գները։ Առանց այդ տվյալների հին ապրանքային տողերի համար շարունակում են օգտագործվել ապրանքի քարտի գները։ Ստուգեք դրանք՝ ավելի ուշ կտրոն տպելուց առաջ։
- Սեփական ինտեգրումները պետք է
print()-ին փոխանցեն պարտադիրcurrencyպարամետրը։ Օրինակները տես PSPG eHDM API ուղեցույցում։ - PayLink, PayForm և WPForms վճարումների համար տպվում են առանց ապրանքների կանխավճարային կտրոններ։ WooCommerce պատվերների համար տպվում են ապրանքային կտրոններ։ GiveWP նվիրատվությունների համար ֆիսկալ կտրոններ չեն ստեղծվում։
- Այլ ծրագրերի և սեփական ինտեգրումների համար օգտագործեք փաստաթղթավորված eHDM API-ն։ Կամայական երրորդ կողմի վճարային հավելումը միայն տեղադրելով՝ չպետք է ենթադրել, որ դրա վճարումները նույնպես ինքնաշխատ ֆիսկալացվում են։
